6 golds pangako ng athletics sa 2019 SEAG
MANILA, Philippines — Hinikayat ni Philippine Athletics Track and Field Association president Philip Juico ang kanyang mga atleta na ibigay ang lahat ng makakaya para makuha ang gold medal sa darating na 30th Southeast Asian Games.
Sa medal projection ng PATAFA ay inaasahan ni Juico na makakakuha sila ng 6 golds, 10 silvers at 8 bronzes sa sa athletics competitions na nakatakda sa Disyembre 5-10 sa 20,000-seat New Clark City athletics’ stadium sa loob ng 9,500-hectare NCC sports complex.
Kabilang sina Harry Diones at Aries Toledo sa malaki ang tsansang makapagtakbo ng gintong medalya sa kanilang mga event.
“Sa triple jump, it’s Harry Diones. He has been a little inconsistent, kaya lang tumataas ang ranking niya. From silver, puwedeng mag-gold iyan,” wika ni Juico. “In decathlon, it’s Aries Toledo, who won gold in Kuala Lumpur. Probably good for a silver, pero puwede ring mag-gold.”
“We urge them to go for it. Ibigay na ang lahat for our country,” dagdag pa nito.
Ang iba pang inaasahang makakakuha ng gold medal sa kanilang mga events ay sina reigning marathon champion Mary Joy Tabal, pole vaulters Ernest John Obiena at Natalie Uy, 800-meter specialist Carter Lilly, hurdles champ Eric Cray, sprinter Kristina Knott at ang bagong hugot na si shot-putter William Morrison.
Bumato ang 21-anyos na si Morrison ng 20.4 meters sa Bloomington, Indiana noong Hunyo na mas maganda sa itinalang 17.42m ni Promrob Juntima ng Thailand para sa gold medal noong 2017 SEA Games.
“Morrison is a candidate for the Olympics. Kaya because he is throwing in the 20s,” sabi ni Juico kay Morrison na isang metro lamang ang layo sa Olympic standard na 21.1m para mag-qualify sa 2020 Tokyo Olympics.
Si Cray ang best bet sa men’s 400-meter hurdles dahil sa kanyang pagiging No. 1 sa SEA rankings.
Nariyan din sina Obiena, may tiket na sa 2020 Olympics, Uy at Lilly.
- Latest
