Hotshots pasok sa quarters

MANILA, Philippines — Sa ikatlong sunod na pagkakataon ay nabigo naman ang TNT Katropa na mai­bulsa ang isa sa apat na ‘twice-to-beat’ incentive sa eight-team quarterfinal round.

Humakot si import Romeo Travis ng 21 points, 12 rebounds at 3 assists para sa 100-93 paggupo ng nagdedepensang Magnolia Hotshots kontra sa Tropang Texters sa 2019 PBA Governor’s Cup kahapon sa University of Southeas­tern Philippines Gym sa Da­vao City.

Nagdagdag ng tig-13 markers sina guards Chris Banchero at Mark Barroca para akayin ang Magnolia sa quarterfinals bitbit ang 6-5 baraha.

Ito naman ang pangatlong dikit na kamalasan ng TNT Katropa para sa 7-3 marka.

Kinuha ng Hotshots ang 35-24 abante mula sa three-point shot ni Barro­ca sa 8:32 minuto ng second period hanggang iposte ang 22-point lead, 53-31 galing sa basket ni Banchero.

Nakadikit naman ang Tropang Texters sa 45-56 sa third quarter sa likod nina import KJ McDaniels, RR Pogoy at No. 2 overall pick Bobby Ray, Parks, Jr.

Pinamunuan ni McDa­niels ang TNT Katropa sa kanyang 33 points kasunod ang 21 markers ni Parks.