MANILA, Philippines — Habang nangangarap si Pinay sensation Margielyn Didal na makapaglaro sa Olympic Games ay hindi naman sang-ayon si skateboarding legend Tony Hawk na mapasama ang sport sa quadrennial event.
Sa isang panayam ay sinabi ni Hawk na hindi kailangan ng skateboarding ng Olympic status dahil masisira nito ang 'counter-cultural standing' ng nasabing sport.
“My only concern of skateboarding on the Olympic platform is that somehow that will inspire people to skate only for fame or fortune,” wika ng 51-anyos na si Hawk, ang inspirasyon para sa popular na 'Tony Hawk's Pro Skater' video game series.
Sinuportahan ng International Olympic Committee (IOC) ang pagsasama sa skateboarding event para sa Tokyo 2020 Games.
Maliban sa skateboarding, binigyan din ng IOC ng 'provisional green-light' ang surfing, climbing at breakdancing para sa 2024 Paris Games.
“Through my more prominent professional years, I wouldn't have cared if it was in the Olympics because we already had our own scene and skateboarding was far more fun and popular than most Olympic sports,” ani Hawk.
Naging isang professional skater si Hawk noong 1982 sa edad na 14-anyos. Sumikat naman ang 20-anyos na si Didal matapos angkinin ang ikaapat na gold medal ng bansa noong 2018 Asian Games sa women's free skate event at nagreyna sa Philippine National Skateboarding Championship noong nakaraang Hulyo sa Santa Rosa, Laguna.
Sasabak ang Cebuana skater sa 2019 Southeast Asian Games sa Nobyembre kung saan nakalatag ang mga events na free skate, park, downhill at game of skate.