Pacquiao pinakain ang mga sinabi ni Thurman
MANILA, Philippines — Wala pa ring kupas si boxing legend Manny Pacquiao matapos iselyo ang split decision win laban kay Keith Thurman para masungkit ang WBA super welterweight belt kahapon sa MGM Grand Garden Arena sa Las Vegas, Nevada.
Maagang inilabas ni Pacquiao ang bagsik nito matapos pakawalan ang solidong right shot dahilan upang bumagsak si Thurman sa first round.
Nagpatuloy ang mainit na kamada ni Pacquiao hanggang fourth round ngunit nagawang makabalik sa porma ni Thurman sa fifth at sixth round kung saan kumunekta siya ng ilang suntok sa Pinoy icon.
Nagbalik ang bagsik ni Pacquiao sa eighth round gamit ang footwork at speed para muling gimbalin si Thurman.
Halos bumagsak pa si Thurman nang paliguan ito ng kaliwa’t kanang suntok ni Pacquiao sa 10th round na nadala nito hanggang sa 12th round para tuluyang makuha ng Pambansang Kamao ang panalo.
Nakuha ni Pacquiao ang boto ng dalawang judges na parehong nagtala ng 115-112, habang nakuha ni Thurman ang 114-113 sa ikatlong judge.
Dahil sa tagumpay, ang 40-anyos na si Pacquiao na ang pinakamatandang welterweight champion sa kasaysayan ng boksing.
“It was fun. My opponent is a good fighter and boxer. He was strong. He's a good boxer and he's strong. I was just blessed tonight,” ani Pacquiao.
Pinuri ni Pacquiao ang magandang inilaro ni Thurman dahilan upang umabot ang laban sa 12 rounds.
Nais na rin kalimutan ng eight-division world champion ang maaanghang na mga salitang binitawan ni Thurman sa pre-fight na tinawag nitong bahagi lang ng promotion para maging maingay ang laban.
“I'm not that kind of boxer who talks a lot, we were just promoting the fight,” ani Pacquiao.
Nakatakdang bumalik si Pacquiao sa Pilipinas para makahabol sa State of the Nation Address ni Pangulong Rodrigo Duterte ngayong araw.
“I think I will fight next year,” wika ni Pacquiao.
- Latest