Naka-2 na ang ROS
MANILA, Philippines — Ang mga role players ng Rain or Shine ang nagpasikat para kunin ang 2-0 bentahe sa kanilang best-of-seven semifinals series ng Magnolia.
Nagtuwang sina big man Norbert Torres, wingman Ed Daquioag at guard Kris Rosales para tulungan ang Elasto Painters na patumbahin ang Hotshots, 93-80 sa Game Two ng kanilang semis showdown sa 2019 PBA Philippine Cup kagabi sa Smart Araneta Coliseum.
Nauna nang pinabagsak ng Rain or Shine, ang No. 2 team sa elimination round, ang Magnolia sa Game One, 84-77 noong Biyernes.
Nagpaulan ng siyam na three-point shots ang Elasto Painters, kasama rito ang perpektong 4-of-4 shooting ni Torres, para magposte ng 43-29 abante sa huling tatlong minuto ng second period.
Nakadikit ang Hotshots sa pagsasara ng first quarter, 18-19 bago naiwanan sa sumunod na yugto.
Mula sa nasabing 14-point deficit ay nakalapit ang Magnolia sa pagsisimula ng third canto, 43-50 mula sa jumper ni Paul Lee. Ngunit hindi bumitaw ang Rain or Shine at muling nakalayo sa 70-55 galing sa triple ni two-time PBA MVP James Yap sa huling 1:28 minuto nito.
Lalo pang ibinaon ng Elasto Painters ang Hotshots matapos itayo ang 23-point advantage, 73-50 buhat sa tres ni Yap sa 9:29 minuto ng fourth quarter.
Samantala, pupuntiryahin naman ng nagdedepensang San Miguel na maiposte ang malaking 2-0 bentahe sa kanilang serye ng Phoenix sa Game Two ngayong alas-7 ng gabi sa Smart Araneta Coliseum.
Pinatumba ng Beermen ang Fuel Masters sa Game One, 100-88 tampok ang 26 points, 7 assists, 5 rebounds at 3 steals ni veteran guard Alex Cabagnot.
- Latest