Ginebra sa quarterfinals na
MANILA, Philippines — Nilasing ng Barangay Ginebra ang NLEX sa pamamagitan ng 105-96 come-from-behind win upang masungkit ang quarterfinals slot sa PBA Season 44 Philippine Cup na dumayo kahapon sa Angeles University Foundation Sports Arena and Cultural Center sa Angeles City, Pampanga.
Apat na miyembro ng Ginebra ang nagtala ng double-digits sa pangunguna ni Japeth Aguilar na kumana ng 27 puntos mula sa 10-of-18 shooting clip para banderahan ang Gin Kings sa pag-abante sa 6-3 marka.
Lumakas din ang tsansa ng Ginebra na makuha ang twice-to-beat card lalo na kung maipapanalo nito ang kanilang huling dalawang laro.
Nagdagdag naman si LA Tenorio ng 17 markers, apat na assists at tatlong boards habang may 14 puntos, walong rebounds at walong assists si Scottie Thompson.
Bumagsak sa 4-6 ang Road Warriors.
Nagawang maitarak ng NLEX ang 18 puntos na kalamangan sa first half ngunit unti-unti itong tinapyas ng Ginebra sa pangunguna nina Aguilar, Tenorio, Thompson at Slaughter para makuha ang panalo.
Samantala, magpapatuloy ang aksyon ngayong hapon tampok ang bakbakan ng Talk ’N Text at Northport sa alas-4:30 sa Smart Araneta Coliseum.
Target ng Katropa na makuha ang ikawalong panalo upang mapalakas ang tsansa nito sa twice-to-beat card sa quarterfinals.
Kung mananalo ang TNT sa Northport, sasaluhan nito sa ikalawang puwesto ang Rain or Shine na nagtataglay ng 8-3 marka.
Magtatagpo naman sa alas-7 ng gabi ang San Miguel Beer (6-4) at Alaska (4-5).
- Latest
