2-sunod sa F2 Logistics; Cignal wagi rin
Laro Bukas (Bacoor Strike Gym)
2 p.m. Cignal vs Sta. Lucia
4:15 p.m. PLDT vs Generika-Ayala
6 p.m. Foton vs Petron
MANILA, Philippines — Hindi na nag-aksaya pa ng oras ang F2 Logistics at winalis ang Sta. Lucia Lady Realtors, 25-21, 25-19, 25-19 upang masungkit ang ikalawang sunod na panalo habang humataw din sina import Erica Wilson at Mylene Paat para iangat ang Cignal HD sa straight-set na panalo kontra sa PLDT Home Fibr, 25-22, 27-25, 25-19, kahapon sa pagpapatuloy ng 2019 Philippine Superliga Grand Prix sa FilOil Flying V Center.
Pinangunahan ni Wilson ang HD Spikers sa kanyang 21 puntos kabilang na ang 15 atake, limang aces at isang block habang si Paat ay tumulong din ng 19 puntos, 12 nito mula sa atake na may kasamang limang blocks at dalawang aces para sa unang panalo ng HD Spikers sa dalawang laro.
“We adjusted Ana Artemeva‘s position. At first she was hesitant, but she was very professional and did her best and followed my instructions,” sabi ni Cignal head coach Edgar Barroga na tukoy ang paglipat sa kanyang Azerbaijan import sa middle spot para maluwag si Paat sa opposite side.
Mula sa 7-11 deficit sa ikatlong set humataw ang HD Spikers ng 6-0 run para agawin ang abante, 13-11 at mula roon hindi na nila binitiwan pa ang bentahe.
Sa ikalawang laro, umani ng 14 puntos si Ara Galang, siyam mula sa atake, apat na blocks at isang ace habang si Abby Maraño ay tumulong ng walong puntos kabilang na ang anim na atake, isang ace at isang block para sa ikalawang sunod na panalo ng F2 Logistics.
- Latest
