Quinto, Lao excited na sa PBA Rookie Draft
MANILA, Philippines — Walang ibang pagsidlan ng kasabikan sina Bong Quinto at Kyles Lao sa kanilang pagsalang sa 2018 PBA Rookie Draft.
Sinabi ni Quinto, iginiya ang Letran Knights sa Final Four ng nakaraang NCAA season 94, na pangarap niyang makapaglaro sa PBA at makasabayan ang kanyang mga iniidolong players.
“Simula nung bata pa lang ako at pumasok ako ng Letran, ‘yun na ang pangarap ko, na talagang makapasok sa PBA,” ani Quinto kahapon. “Lahat ng paghihirap ko, bukas hanggang Sunday, malalaman mo kung worth it ba. Hindi natin alam ang mangyayari doon pero sobrang excited na ako.”
Hindi rin maitago ni Lao, ang UAAP Rookie of the Year mula sa UP Fighting Maroons, ang kanyang pagkasabik na matupad ang kanyang pangarap.
Bumisita ang dalawa sa lingguhang Philippine Sportswriters Association (PSA) Forum sa Tapa King Restaurant sa Farmer’s Plaza sa Cubao.
Sasabak ang dalawa sa two-day PBA Draft Combine sa Gatorade Hoops Center ngayong araw para sa anthropomorphic tests at bukas para sa isang single-day tournament.
- Latest
