Creamline Cool Smashers bumubuo ng dinastiya sa PVL
MANILA, Philippines — Bumubuo ng dinastiya ang Creamline matapos masungkit ang ikalawang sunod na korona matapos pagreynahan ang Premier Volleyball League Season 2 Open Conference kamakalawa.
Matikas na winalis ng Cool Smashers ang kanilang best-of-three championship series ng Ateneo Lady Eagles.
Naitala ng Creamline ang 25-17, 25-10, 25-15 panalo sa Game One, habang hindi na nila pinaporma pa ang Ateneo makaraag kubrahin ang 25-20, 25-20, 25-15 demolisyon sa Katipunan-based team sa Game Two.
Malaking dahilan ng pag-akyat ng Cool Smashers sa tuktok ang dynamic duo na sina outside hitter Alyssa Valdez at playmaker Jia Morado.
Nasungkit ni Valdez ang Season MVP at Best Outside Hitter awards at pinangalanang Finals MVP at Best Setter si Morado.
Hindi rin matatawaran ang kontribusyon nina Michele Gumabao, Jema Galanza, Risa Sato at Maria Paulina Soriano na tunay na maaasahan sa oras na kailangan ng puntos ng Creamline.
Minanduhan naman ni libero Melissa Gohing ng floor defense para mas mapadali ang setting chores ni Morado.
Ngunit numero unong dahilan para maabot ng Cool Smashers ang tugatog ng tagumpay ay ang Thai head coach na si Tai Bundit.
Inialay ng Creamline family ang Open Conference title para kay Bundit na nakatakda nang lisanin ang tropa upang bumalik sa Bangkok, Thailand para pagtuunan ng pansin ang kanyang pamilya.
“Iba ‘yung training niya. Kahit sobrang hirap ng ipinapagawa niya, makikita mo yung improvement mo. He also cares for his players,” wika ni Valdez kay Bundit na dating coach ng Lady Eagles sa UAAP.
Kaya naman sa paglisan ni Bundit ay malaking hamon para sa Cool Smashers na kumuha ng coach na papalit sa puwesto nito at maipagpatuloy ang maganda niyang nasimulan.
- Latest
