3 players napatalsik sa laro dahil sa rambol
LOS ANGELES -- Umiskor si LeBron James ng 24 points para sa Lakers sa kanyang magulong home debut kung saan tatlong players ang napatalsik dahil sa suntukan sa dulo ng fourth quarter sa 124-115 panalo ng bisitang Houston Rockets.
Sinibak sa laro si Chris Paul ng Houston at sina Brandon Ingram at Rajon Rondo ng Los Angeles sa huling 4:13 minuto ng fourth period na isa sa mga serye ng komprontasyon sa naging pangit na pagsalubong ng mga fans ng Lakers para sa unang home game ni James.
Dikit ang laro hanggang matawagan ng foul si Ingram sa kanyang pagdepensa kay James Harden, tumapos na may 36 points.
Itinulak ni Ingram si Harden at kinompronta si referee Jason Phillips matapos ang kanyang technical foul.
Sa sumunod na sandali ay dinuro naman ni Paul sa mukha si Rondo na gumanti ng suntok sa Rockets point guard.
Nagpakawala ng suntok si Ingram habang nagkakagulo ay inilayo naman ni James ang kaibigang si Paul sa pakikipagrambulan kay Rondo.
Sa pagbabalik ng aksyon ay tumipa si Harden ng isang three-pointer para ibigay sa Rockets ang unang panalo sa season.
Nagtala rin si James ng 5 rebounds at 5 assists, habang kumolekta si JaVale McGee ng 16 points at 6 rebounds sa kanyang Lakers home debut.
Nagdagdag si Rondo ng 13 points at 10 assists bago napatalsik sa laro.
Sa iba pang laro, tinalo ng Indiana Pacers ang Brooklyn Nets, 132-112 at binigo ng Toronto Raptors ang Washington Wizards, 117-113.