Guiao tinapik ng SBP sa WC qualifiers
JAKARTA-- Muling tinapik ng Samahang Basketbol ng Pilipinas si NLEX head coach Yeng Guiao para gabayan ang Gilas Pilipinas sa pagsagupa sa Iran at Qatar sa 2019 FIBA World Cup Asian Qualifiers sa Setyembre.
Nauna nang hinirang ni SBP president Al Panlilio si Guiao na igiya ang Philippine team sa 18th Asian Games dito.
Ibinunyag ni Panlilio ang kanyang paghirang kay Guiao bilang kapalit ni Chot Reyes sa Gilas sa final practice ng Nationals sa paghahanda laban sa China.
“The SBP has decided to appoint coach Yeng for the next window. We advised him last night and he accepted it,” wika ni Panlilio. “He didn’t say yes right away but he considered his experience here coaching the Asian Games. That was a big factor in him accepting it.”
Kinailangan ng SBP na kumuha ng bagong coach at mga players matapos ang ipinataw na suspensyon ng FIBA kay Reyes, assistant coach Jong Uichico at players Andray Blatche, RR Pogoy, Troy Rosario, Jayson Castro, Terrence Romeo, Calvin Abueva, Carl Bryan Cruz, Japeth Aguilar, Matthew Wright at Jio Jalalon sa Gilas-Australia ‘basketbrawl’.
Ang nasabing mga players ay hindi magagamit ng Gilas laban sa Iran sa Setyembre 13 sa Tehran at kontra sa Qatar sa isang closed-door game sa Manila sa Setyembre 17.
Si Guiao ay tumayong national coach ng Gilas sa FIBA Asia Championship sa Tianjin, China noong 2009.
- Latest
