Pacman maraming isinakripisyo
Para matalo si Matthysse
MANILA, Philippines — Nagbalik ang mababangis na mata ni Manny Pacquiao gayundin ang pamatay na suntok nito.
Kitang-kita ito nang itarak ng Pinoy boxing sensation ang seventh-round technical knockout win laban kay Lucas Matthysse ng Argentina para maagaw ang World Boxing Association welterweight belt.
Subalit hindi biro ang pinagdaanan ni Pacquiao para maibalik ang angas nito.
Maraming isinakripisyo si Pacquiao.
Tinukoy nito ang kanyang preparasyon kay Matthysse bilang isa sa pinakamahirap na training camp na pinagdaanan nito sa kanyang career.
Ngunit hindi matatawaran ang dedikasyon ni Pacquiao para maibalik ang bangis ng kanyang kamao.
“Nung in-announce pa lang yung laban namin ni Matthysse, sinabi ko na sa sarili ko na kailangan kong maging seryoso sa training,” wika ni Pacquiao.
Maraming bagay ang isinantabi ng Pambansang Kamao.
Dati, nakakapaglaro pa si Pacquiao ng basketball at nakakapagpuyat dahil sa paglalaro ng chess sa gabi.
Umiwas din ito sa paglalaro ng billiards at darts.
Mga bagay na tinukoy ng Team Pacquiao bilang distractions sa kanyang training camp.
“Yun talaga ang pinakamahirap na training camp namin. Marami akong isinakripisyo na ginagawa ko dati na hindi ko ginawa sa training camp namin this time. Sinunod ko lahat ng restrictions,” ani Pacquiao.
At masaya si Pacquiao sa naging resulta.
Kaya naman saludo ito sa ginawa ng Team Pacquiao sa pangunguna nina Buboy Fernandez at Australian strength and conditioning expert Justin Fortune.
Kasama rin sa grupo sina Nonoy Neri, Roger Fernandez at Ting Ariosa.
“It’s (camp) one of the best camps we had. Na-cover namin lahat ng aspects two weeks before the fight. Nakagawa kami ng game plan at na-execute ng maayos during the fight,” ani Pacquiao.
Magandang panalo rin ito para kay Fernandez na pinagdudahan ang kanyang kakayahan na hawakan ang traning ni Pacquiao matapos mawala si American trainer Freddie Roach.
Related video:
- Latest