MANILA, Philippines - Muling dumaan sa butas ng karayom ang Bali- Pure bago kubrahin ang 17-25, 26-24, 25-23, 25-22 panalo laban sa Power Smashers upang sumulong sa unahan ng standings ng Premier Volleyball League Reinforced Conference kahapon sa The Arena sa San Juan City.
Nagpasiklab sa pangkakataong ito si Far Eastern University standout Jerilli Malabanan na pumalo ng 20 puntos habang umariba rin si three-time NCAA MVP Grethcel Soltones na kumamada ng 15 puntos.
Bagamat nanalo ang kanyang bataan, hindi pa rin kuntento si BaliPure coach Roger Gorayeb sa inilaro ng kanyang bataan.
“Ang sama ng laro. Okay lang naman na magkamali pero kailangan matuto sila sa mga pagkakamali nila dahil part yun ng learning process. Kailangang mag-mature ang mga players,” ani Gorayeb.
“May mga dapat pang ayusin lalo na sa serves. Hindi pa rin ganun ka-solid ang team dahil nagkakahiyaan pa. Walang communication sa loob ng court. Mga maliliit na bagay na dapat pagtuunan ng pansin para mas maging maganda ang laro namin,” wika pa ng beteranong mentor na siyang humahawak sa National University at San Sebastian College.
Sumulong ang Purest Water Defenders sa 2-0 panimula habang nahulog sa 1-1 ang Power Smashers.
Nauna nang tinalo ng Bali Pure ang All-Filipino Conference runner-up Philippine Air Force sa opening day noong Linggo.
Sa men’s division, namayani ang Sta. Elena Wrecking Balls laban sa Café Lupe Sunrisers sa bisa ng 21-25, 20-25, 25-14, 25-18, 15-12 come-from-behind win.
Dinala ni Ace Mandani ang Sta. Elena sa unang panalo makaraang humataw ito ng 16 puntos mula sa 14 attacks at dalawang aces habang nag-ambag si University of the East player Edward Camposano ng 14 markers.