CLEVELAND--Isinalpak ni J.R. Smith ang pitong tres at nagposte ang Cavaliers ng NBA-record na 25 triples tungo sa 123-98 pananaig laban sa Atlanta Hawks nitong Miyerkules ng gabi sa Game 2 ng kanilang Eastern Conference second-round semifinals series.
Nagpaulan ang Cavs ng 18 3-pointers sa first half bago nagdagdag ng pito pa matapos ang halftime upang tuluyang hiyain ang Hawks, na natalo ng 10 sunod sa postseason games sa Cleveland.
Ang kinamadang 25 3-pointers ng Cleveland ang pinakamarami sa lahat ng regular o postseason.
Gumawa si LeBron James ng apat na triples na tumapos ng 27 puntos para sa nagdedepensang Eastern Conference champion, inilabas ang kanilang pinakamahusay na outside shooting game sa kasaysayan ng NBA.
Kumamada ang Cavs ng 25-of-45 sa rainbow area kung saan 10 manlalaro nito ang umiskor ng tig-isang tres o higit pa.
Ipinasok ni Smith ang kanyang anim na triples sa first half para itayo ang 38-point lead ng Cavs.
Nakatakda ang Game Three sa Biyernes sa bakuran ng Atlanta kung saan hawak ng Cleveland ang matayog na 2-0 bentahe sa serye.
Tumapos si Paul Millsap ng 16 puntos at may 14 puntos si Jeff Teague para sa Hawks.