DOHA, Qatar - Inaasahang ibibgay nina Rogen Ladon ng Bago City at Eumir Felix Marcial ng Zamboanga City ang kanilang makakaya para magkampeon sa 2015 AIBA World Boxing Championships dito sa Ali Bin Hamad Al Attiyah Arena.
Unang sasalang sa aksyon si Ladon sa pagsagupa kay Argentinian fighter Lenadro Blanc, isang beterano ng World Series of Boxing.
Si Blanc ay nauna nang binigo ni Filipino pug Mark Anthony Barriga sa naturang torneo noong nakaraang taon.
Hindi nakasali si Barriga sa Asian Men's Championships sa Bangkok, Thailand noong Setyembre dahil sa pinapagaling pa niyang hand surgery.
Nakamit nina Ladon at Marcial ang karapatang makasali sa torneo matapos kumuha ng silver medal sa nakaraang Asian qualifiers.
Matapos si Ladon ay si Marcial naman ang aakyat sa boxing ring sa pagsagupa kay Said Mohamed Walid ng Egypt na nagbulsa ng tansong medalya sa nakaraang African qualifiers.