Meralco, may dagdag-singil ngayong Mayo
MANILA, Philippines — Inianunsiyo kahapon ng Manila Electric Company (Meralco) na magpapatupad sila ng P0.4621 kada kilowatt-hour (kwh) na taas sa singil sa kuryente para sa May billing.
Sa isang pahayag, sinabi ng Meralco na dahil sa taas-singil, ang overall electricity rate ngayong buwan ay magiging P11.4139/ kWh na, mula sa dating P10.9518/ kWh noong Abril.
Ayon sa Meralco, ang taas-singil ay bunsod nang pagtaas ng generation charge, na dulot ng mas mataas na presyo ng Wholesale Electricity Spot Market (WESM) at Power Supply Agreements (PSAs).
Nangangahulugan ito na ang mga tahanang nakakonsumo ng 200kwh kada buwan ay madaragdagan P92 na bayarin; P139 naman ang madaragdag sa bayarin ng mga nakakakonsumo ng 300kwh; P185 para sa mga nakakakonsumo ng 400kwh at P231 naman para sa nakakagamit ng 500kwh kada buwan.
Una nang sinabi ng Energy Regulatory Commission (ERC) na asahan na ang pagtaas ng power rates ngayong Mayo bunsod ng naranasang Red at Yellow Alerts nitong mga nakalipas na araw, dahil sa manipis na suplay na kuryente.
- Latest