Mukha ng ‘killers’ ng abogada nakunan ng CCTV, inilabas ng PNP
MANILA, Philippines — Inilabas na kahapon ng Philippine National Police (PNP) ang larawan mula sa CCTV footage ng mga suspek na bumaril at nakapatay kay Atty. Maria Saniata Liwliwa Gonzales Alzate sa Bangued, Abra.
Ayon kay PNP Public Information Office Chief, Colonel Jean Fajardo, makikilala sa CCTV footage ang mukha ng mga suspek na tumakas matapos ang pamamaslang kay Alzate na isang human rights lawyer.
Kasunod nito, umapela si Fajardo sa publiko na ipagbigay alam sa kanila ang posibleng kinaroroonan ng suspek.
Sa ngayon ay nagsasagawa ng manhunt operation ang PNP laban sa mga suspek
Una nang nakita sa CCTV ang pamamaril kay Alzate nang lapitan ito ng isa sa mga suspek habang nakaparada sakay ng kanyang kotse sa harap ng kanyang bahay. Muli itong binalikan ng mga suspek at saka muling pinagbabaril.
Ayon sa mga kamag-anak ng biktima, wala naman itong natatanggap na banta bago ang insidente.
Sinabi ni Fajardo, na nagpapatuloy sa ngayon ang imbestigasyon sa kaso at ipapa-enhance nila sa PNP Anti-Cybercrime Group ang hawak nilang CCTV para mas malinaw ang kuha sa mga suspek.
- Latest