Sa alegasyon ng pang-aabuso
MANILA, Philippines — Hinikayat ni PNP-OIC chief PLt.Gen. Vicente Danao ang human rights groups na sumama sa kanilang mga ikakasang anti-illegal drug operations upang maiwasan ang mga alegasyon na may pang-aabuso sa kanilang war on drugs.
Ayon kay Danao, welcome ang mga human rights groups na sumama sa kanilang operasyon dahil wala naman itinatago ang PNP.
Nais lamang nilang matigil ang isyu na may paglabag sa karapatang pantao sa tuwing nagsasagawa sila ng drug operations.
Aniya, kung may nasawi sa operasyon, nangangahulugan lamang na nanlaban ang mga suspek dahilan para protektahan din ng mga operatiba ang kanilang mga sarili laban sa mga kriminal.
Kunuwestiyon ni Danao na, bakit hindi pinapansin ng human rights groups ang mga nasawing pulis sa operasyon at tinututukan lamang ang mga kriminal.
Maituturing na ‘unfair’ sa PNP na kwestiyunin ang kanilang war on drugs at hindi nakikita ang sakripisyo na umaabot sa pagbubuwis ng buhay.
Batay sa record, nasa 800 mga pulis na ang nasawi sa kanilang anti-illegal drug operations.