MANILA, Philippines — Bilang paghahanda sa dalawang linggong Enhanced Community Quarantine (ECQ) sa National Capital Region (NCR),nagsimula nang mamahagi ng mga bagong quarantine pass ang Valenzuela City sa kanilang mga residente.
Ayon sa Valenzuela LGU, ngayon pa lamang ay dapat nang matanggap ng mga residente ang kanilang quarantine pass upang maiwasan ang kalituhan at gulo sa pagsisimula ng ECQ sa Linggo, Agosto 6 hanggang Agosto 20 laban sa pagkalat ng Delta variant.
Ang mga barangay ang magdadala ng quaratine pass sa bawat pamilya na magagamit sa pagbili ng kanilang mga kailangan. Gayunman, hindi naman maaaring gamitin ang quarantine pass sa curfew hours na alas- 8 ng gabi hanggang alas-4 ng madaling araw.
Hindi rin maaaring ipagamit sa buntis, may comorbidities at immunodeficiency, senior citizens at menor-de-edad ang quarantine pass maliban na lamang kung emergency at tanging sila lamang ang maaaring lumabas.
Nilinaw din ng Valenzuela LGU na hindi na kailangan ng quarantine pass ng Authorized Person Outside Residence (APOR) na may Company ID at Certificate of Employment, mga naka schedule ng vaccination at mga business owners na may valid ID.
Paalala ng Valenzuela LGU, laging dalhin ang quarantine pass gayundin ang ValTrace QR codes na ipapakita sa mga establisimyento.