MANILA, Philippines — Dahil sa hindi pagsusuot ng face mask, arestado ang isang lalaking dumayo sa isang lugar sa Taguig City at nadiskubreng may dalang baril at granada habang nakatayo sa tabi ng scooter, nitong Linggo.
Nakilala ang dinakip na si Rex Pereda, 29 , ng St. Francis St., Oranbo Pasig City. Hindi na ito pumalag nang kapkapan sa beywang at makumpiskahan ng Magnum 22 revolver at belt bag na may lamang hand grenade.
Sa ulat, dakong alas-12:20 ng hapon kamakalawa nang unang masita ang suspek ng mga tauhan Intelligence Section sa isinagawang anti-criminality operation habang nakatayo sa tabi ng isang motorsiklo malapit sa Shane Store, sa Capistrano St., Brgy. Hagonoy, Taguig City na walang suot na face mask. Nang lapitan ng mga awtoridad ay napuna ang nakabukol sa beywang na sa huli ay nadiskubreng baril.
Nakatakdang ihain sa Taguig Prosectors’ Office ang reklamong paglabag sa City Ordinance #12 series 2020 sa hindi pagsusuot ng face mask; Republic Act 10591 (Illegal Possession of Firearm and Ammunition) at RA 9516 (Illegal Possession of Explosive).