MANILA, Philippines – Nasabat ng Manila Police District (MPD)ang P5.7 milyong halaga ng hinihinalang shabu mula sa 3 “high-value target” sa isang buy- bust operation sa Tondo, Maynila kahapon ng umaga.
Kinilala ni MPD Director Brig. Gen. Bernabe Balba ang mga naarestong sina Anowar Mocamad, Tato Amiril, at Fatima Garcia.
Ayon kay Balba, mula pa sa Mindanao ang mga suspek na kilalang mga kilabot na tulak ng iligal na droga.
Dakong alas-5 ng umaga nang isagawa ng mga pulis ang buy-bust operation sa kanto ng Simeon De Jesus at Malaya Sts..
Nasa 850 gramo ang drogang nakuha sa mga suspek na matagal na umanong tinitiktikan ng pulisya at hinihinalang kasapi ng isang sindikato.
“Siguro dahil sila iyong mga kilala, trusted, sila ang pinagdadala ng droga kung saan man,” ani Balba.
Responsable umano ang mga suspek sa pakikipagtransaksyon ng droga sa ibat-ibang lugar sa Metro Manila kabilang ang Maynila.
Pinangalanan din ng mga suspek ang iba pang drug personality na iniimbestigahan na ng mga pulis.
Nasa kustodiya ng MPD ang 850 gramo ng shabu, P5.7 milyon, buy-bust money na P16,000 at tatlong cellphone.
Mahaharap sa paglabag sa Comprehensive Dangerous Drugs Act of 2002 ang tatlo.