MANILA, Philippines — Tatlo-katao ang nasugatan makaraang salpukin ng SUV ang kasalubong na kotse sa bisinidad ng Bukaneg Street sa Pasay City kahapon ng madaling araw.
Kaagad na isinugod sa pagamutan ang mga sugatang biktima na sina JT Medilo, 22; Princess Fabroa,14, habang inaalam pa ang pagkakilanlan ng isa pang biktima.
Sa ulat ng Pasay City Traffic Bureau, naganap ang insidente pasado alauna ng madaling araw sa nabanggit na lugar.
Nabatid na galing sa parking lot ang puting Chevrolet Trailblazer (RCB 72) nang biglang tumawid ito sa center island kaya nasalpok nito ang punungkahoy.
Gayundin, nasalpok ng SUV ang kasalubong na itim na Toyota Vios (POC-322) na kapwa nakasakay naman dito ang mga biktimang sina Medilo at Fabroa.
Binangga pa ng SUV ang harang ng mga halaman at sumampa sa gutter hanggang sa nabangga rin nito ang tumatawid na pedestrian na inaalam pa ang pagkakakilanlan.
Sa hindi nabatid na dahilan ay pansamantalang itinago ang pagkakakilanlan ng driver ng SUV na nasa custody ngayon ng pulisya.