MANILA, Philippines – Bumagsak sa kamay ng Southern Police District (SPD) ang number 2 most wanted criminal sa Southern Metro Manila at sangkot umano sa ilang serye ng pangangarnap ng mga motorsiklo at pagnanakaw, kamakalawa ng hapon sa Muntinlupa City. Kinilala ni Chief Supt. Henry Ranola Jr., director ng SPD ang akusadong si Jericho Pagkalinawan, alyas Jericho, ng Brgy. Bayanan ng naturang lunsod.
Base sa report na natanggap ni Chief Supt. Ranola, alas-5:00 ng hapon nang madakip si Pagkalinawan sa Bautista St., Brgy. Bayanan ng naturang lungsod ng operatiba ng Intelligence Division ng SPD sa bisa ng warrant of arrest na inisyu ng Muntinlupa City Regional Trial Court (RTC).
Ayon sa pulisya, itinuturing nilang number 2 most wanted criminal ng SPD ang nadakip na si Pagkalinawan dahil sa pagkakasangkot sa serye ng karnap. May standing warrant of arrest din ito sa kasong attempted murder na inisyu ni Judge Philip Aguinaldo, ng Muntinlupa City Regional Trial Court (RTC), Branch 207.