MANILA, Philippines — Inihayag kahapon ni Vice President at DepEd Secretary Sara Duterte na hindi kailangang ipagpatuloy ang peace negotiations sa National Democratic Front of the Philippines (NDFP) matapos ang pag-atake ng mga komunistang rebelde sa Masbate, na nagresulta sa pagkaantala ng klase sa lalawigan.
Sinabi ito ni Duterte bilang reaksiyon sa pahayag ni House Deputy Minority Leader France Castro ng ACT Teachers party-list, na ang naturang pag-atake ay nagpapakita lamang ng pangangailangan na buhaying muli ang peace talks sa pagitan ng pamahalaan at NDFP, upang matugunan ang ugat ng naturang armed conflict.
“Castro’s assertion that the peace negotiations would address the root causes of the armed conflict was ludicrous. Instead, it would only give legitimacy to the absurdity of the terrorism perpetrated by the armed wing of the NDFP, the NPAs (New People’s Army),” ayon kay Duterte.
“Negotiating with the NDFP is always doomed to fail. Malinaw sa kasaysayan na ang magbe-benepisyo lang ng peace talks ay ang NPA at mga grupong katulad ng ACT Teachers,” dagdag pa ng bise presidente.
Una nang iniulat ni Duterte na ang mga pag-atake na isinagawa malapit sa mga paaralan, ay nagresulta sa suspensiyon ng klase sa anim na bayan, at nakaapekto sa mahigit 55,000 mag-aaral at 2,815 personnel.
Nanindigan din si Duterte na ang nangyari sa Masbate ay hindi pwedeng gawing dahilan para buhayin ang peace negotiations.