132K nabigyan ng 1st booster sa 3 araw na ‘Bakunahang Bayan’
MANILA, Philippines — Mahigit sa132,000 indibiduwal ang nabigyan ng first booster laban sa COVID-19 sa isinagawang 3-araw na ‘Bakunahang Bayan’, ayon sa Department of Health (DOH).
“We were able to vaccinate first booster doses to 132,770 individuals nationwide,” ani DOH officer-in-charge Maria Rosario Vergeire sa press briefing kahapon.
Tumaas din aniya, ang coverage ng may edad 5 hanggang 11 sa 49.3% o 33,239. Target ng pamahalaan na mabakunahan ang 10.8 milyon sa grupong ito.
Layunin ng special inoculation drive na isinagawa mula Disyembre 5 hanggang 7 na pataasin ang booster uptake at pagbabakuna sa pediatric population.
Sa pinakahuling tala, nasa 73.6 milyong Pilipino na ang fully vaccinated laban sa COVID-19, kung saan kabilang ang 20.9 milyon na nabigyan na ng booster.
Sa briefing, sinabi ni Vergeire na hindi niya binabawasan ang posibilidad na ang mga bakuna sa COVID-19 ay maaaring maging taun-taon dahil ang virus ay patuloy na nagmu-mutate at naglalabas ng mga bagong variant.
Samantala, bukas naman ang DOH sa panukala na gawing annual at bi-annual ang pagbibigay ng bakuna laban sa COVID-19 dahil na rin sa patuloy pa rin ang pagmu-mutate at pagsulpot ng mga bagong variants.
Nabanggit niya na ang kaligtasan sa sakit mula sa pangunahing serye ng COVID-19 ay humihina sa paglipas ng panahon.
- Latest