HIV treatment hubs ikakalat sa Pinas

MANILA, Philippines — Plano ng Department of Health (DOH) na paramihin pa ang bilang ng human immunodeficiency virus (HIV) treatment hubs sa bansa sa layuning mas maging accessible ang mga serbisyo.

“Sa serbisyong medikal, pinapalawig natin ‘yung pagpaparami ng testing sites, treatment hubs, and primary HIV care facilities para ‘yung mga key populations natin ay hindi na kailangan dumayo sa urban area para mag access ng kanilang services,” ayon kay DOH-Prevention and Control Bureau Program Expert Roland Sardan.

Sa kasalukuyan ay mayroon nang 184 treatment hubs at primary HIV care facilities sa buong bansa.

“Ginagawa natin itong pagpapalawig para po ma-access ang services sa pinakamalapit na lugar sa kanila,” aniya.

Bukod sa serbisyong medikal, kabalikat din ng DOH ang ilang organisasyon upang mabigyan ng proteksyon ang ‘people living with HIV’ o PLHIV laban sa diskriminasyon.

“Karamihan kasi ng Persons Living with HIV natin ay nakakaranas ng iba’t-ibang uri ng inequalities. Kunwari sa pag access ng serbisyong pang medikal, pagkakaroon ng tamang trabaho, legal service at iba pa,”paliwanag ni Sardan.

“For legal services, meron tayong mga kaakbay na civil society organizations na sila ‘yung tumutulong para sa PLHIV na meron mga concerns regarding legal cases, kunyari nadiscriminate, unjust na natanggal sa trabaho,” dagdag pa niya.

Sa pinakahuling datos nitong Oktubre, nasa 1,383 ang kabuuang kumpirmadong HIV-positive individuals.

Mula sa nasabing bilang, 1,346 ang nakakuha ng HIV sa pamamagitan ng sexual contact, 15 dahil sa paggamit ng infected needles, 6 mother-to-child transmission, habang 16 ang ‘di pa tukoy kung paano nahawaan.

Ang Pilipinas ay nakapagtala na ng kabuuang 107,177 simula noong 1984.