Ilan sa 433 nagwagi sa Grand Lotto, kumubra na
MANILA, Philippines — Kinumpirma kahapon ng Philippine Charity Sweepstakes Office (PCSO) na ilan na sa may 433 jackpot winners ng GrandLotto 6/55 noong Sabado, ang nagtungo na sa kanilang punong tanggapan sa Mandaluyong City upang kumubra ng kanilang premyo.
Sa paabiso ng PCSO, mismong si PCSO Vice Chairperson at General Manager Melquiades ‘Mel’ Robles ang nanguna sa pagsalubong sa mga lucky lotto winners.
Personal na iniabot ni Robles ang premyo ng mga lucky winners at pinasalamatan ang mga ito dahil sa pagtangkilik sa kanilang mga palaro.
Binati rin niya ang mga ito sa kanilang pagkapanalo sa lotto.
Ilan rin sa mga mapalad na mananaya ang nagbigay ng pahintulot sa PCSO na magpakuha ng larawan at ipakita ang kanilang mga lucky tickets sa publiko.
Matatandaang Sabado ng gabi nang tamaan ng may 433 lucky winners ang P236,091,188.40 jackpot prize ng GrandLotto 6/55, matapos na mahulaan ang winning combination na 09-45-36-27-18-54.
Ayon kay Robles, aabot sa tig- ?545,245.23 ang maiuuwing premyo ng mga lucky winners.
- Latest
