Kulong, multa sa nuisance candidates – Comelec
MANILA, Philippines — Isinulong ng Commission on Elections na gawing isang krimen ang pagsusumite ng certificate of candidacy ang (COCs) ng mga ‘nuisance candidates’ na nililito lang ang mga botante tuwing halalan.
Ayon kay Comelec spokesperson John Rex Laudiangco, labis na nakakaapekto ang mga ‘nuisance candidates’ tulad ng insidente sa Negros Oriental noong Mayo 2022 elections, na ang boto ng isang ‘nuisance’ na si “Ruel Degamo” ay nailagay kay dating Governor Roel Degamo.
Nagresulta ito sa pagpapawalang-saysay ng Comelec sa pagkapanalo ni Governor Henry Teves.
Naging ‘trend’ na umano at inaabangan ng publiko ang pagsulpot ng mga ‘nuisance candidates’ tuwing halalan, kaya kinakailangan na silang patawan ng parusa.
“Isusulong po sa pamamagitan ng administration ni Chairman George Garcia na sana ‘yung mga ganitong bagay ay mai-declare, ma-criminalize po kasi nagiging uso ito,” saad ni Laudiangco.
Paulit-ulit na lang kada eleksyon, meron at merong tumatakbo na halos kapangalan, katunog ng pangalan ng mga lehitimong kandidato na ang tanging dahilan ay para gawing mockery ang eleksyon, lituhin ang mga tao,” dagdag pa niya at iginiit din na mapakulong o mapatawan ng multa ang mga mapapatunayang nagkasala.
- Latest