MANILA, Philippines — Tiniyak ng Philippine National Police (PNP) na handa silang imbestigahan ang ulat ng umano’y pananabotahe sa darating na May 9 elections matapos ang pahayag tungkol dito ng tatlong presidentiables.
Sa isinagawang press briefing kahapon sa Camp Crame, sinabi ni PNP chief General Dionardo Carlos, na lahat ng reklamo ay kanilang tinutugunan maging election related issue o hindi.
Sa ngayon aniya, wala pa silang natatanggap na ulat hinggil dito subalit tatanungin nila rito si Senator Panfilo Lacson, isa sa mga kandidato sa pagka-pangulo.
“So far I have here, si Police Major General Valeriano de Leon, (Directorate for Operation), he’s monitoring for the elections. Wala naman tayong major reports of ganun,” ani Carlos.
Sa isinagawang joint presscon nitong Linggo nina Lacson, Manila Mayor Isko Moreno at dating National Security Adviser Norberto Gonzales, nagbabala sila hinggil sa umano’y destabilisasyon sa darating na halalan sa May 9.
Aminado naman si Lacson na hindi pa nila nabeberipika ang natanggap na ulat.