Kung makokolekta: Mas nakakaraming Pinoy makikinabang sa P203 bilyong estate tax ng mga Marcos
MANILA, Philippines — Marami na sanang mapaggagamitan kung nasingil ang P203 bilyong Estate Tax sa gobyerno ng pamilya Marcos.
Ayon kay senatorial aspirant Alex Lacson, sakaling masingil ang utang ng pamilya Marcos, maaaring makapagpatayo ang gobyerno ng 81,200 silid-aralan at 13,533 kilometrong farm-to-market road, o bumili ng 135,333 patrol cars para sa pulisya. Maaari rin itong magamit sa pagbili ng 157,000 ICU beds, o 52,000 General X-Ray facilities na makatutulong sa mahigit 877,600 COVID-19 patients.
“Ganyan kalaki ang sisingilin mula sa mga Marcos,” ayon kay Lacson. “Kung nabayaran sana ito noong 1999 nang naging final and executory sa Supreme Court ang halagang P23 bilyon, eh ‘di sana hindi na ito lumobo sa P203 bilyon.”
“But the Marcos family continues to employ legal maneuvers to escape liability,” giit ng abogado na tumatakbong senador sa ilalim ng Robredo-Pangilinan tandem.
“Kung nasingil sana ito at naidagdag sa panggastos sa napakaraming programa ng pamahalaan, nakapagdulot sana ito ng ginhawa sa mga mamamayan, lalo na noong kasagsagan ng pandemya.”
Iginiit pa ni Lacson na kapag nasingil ang utang ng mga Marcos, maaaring mabawasan ang kakulangan sa silid-aralan na umaabot sa 123,994.
“Kaya nitong pondohan ang 70% ng pangangailangan ng Universal Health Care Act sa susunod na limang taon o nakapagpatayo rin sana ng 406,000 na pabahay para sa mahihirap na pamilya, o 88 na ospital na may sampung palapag,” ayon sa senatorial candidate.
Makakatulong din ito sa pagbibigay ng ayuda sa 20.5 milyong pamilya na tig-P9,900 bawat isa, or nakapagpaaral ng 422,000 na iskolar,” dagdag niya.
“Marami sana tayong nagawa sa perang ito. Pero ano ang nangyari? Pilit na iniiwasang bayaran ng pamilya Marcos,” giit niya.
- Latest