MANILA, Philippines — Kalat na ang Omicron variant ng COVID-19 sa 15 lugar sa Metro Manila base sa resulta ng ‘genome sequencing’ ng Department of Health (DOH).
Hindi naman tinukoy ni DOH Epidemiology Bureau director Dr. Alethea de Guzman ang mga partikular na lugar na nakitaan ng Omicron cases na kaniya nang tinukoy na ‘dominant variant’ na sa Kamaynilaan.
“Our latest whole genome sequencing showed that the Omicron variant is now the predominant variant in the National Capital Region,” ayon kay de Guzman.
Bukod sa 15 sa 17 lugar sa Metro Manila, natukoy na rin ang Omicron sa 13 sa 17 rehiyon sa bansa.
Masasabi umano ngayon na ang pagtaas ng mga kaso ng COVID-19 sa bansa ay dulot ng mas nakakahawang Omicron variant, ayon pa kay de Guzman.
Mas nakatulong pa umano sa pagtaas ng mga kaso ang mas malayang paggalaw ng publiko, pagluluwag sa pagsunod sa ‘health protocols’, at maging pagkaantala sa pagtukoy at agarang paghiwalay sa mga pasyenteng naimpeksyon.