Duterte ‘di makikipagtulungan sa ICC probe – Malacañang

MANILA, Philippines — Tiniyak kahapon ng Malacañang na hindi makiki­pagtulungan si Pangulong Rodrigo Duterte sa anumang imbestigasyon na posibleng gawin ng International Criminal Court (ICC) kaugnay sa sinasabing crimes against humanity dahil sa mga nangyaring pagpatay dahil sa ilegal na droga.

Ayon kay Presidential spokesperson Harry Roque, natanggap na niya ang impormasyon na tinapos na ang preliminary investigation laban sa Pangulo at hihilingin na ang pagsisimula ng pre-trial.

“As of 11:30 last night, I received information that the ICC Prosecutor (Fatou) Bensouda has concluded her preliminary examination against President Rodrigo Roa Duterte for the alleged crime of crimes against humanity. She will now seek judicial authorization from the pre-trial chamber of the ICC to formally conduct investigation against President Rodrigo Roa Duterte,” ani Roque.

Pero sinabi ni Roque na pulitikal na ang isyu at hindi makikipag-cooperate ang Pangulo.

Ipinunto rin ni Roque na gumagana ang mga institusyon sa bansa at independent ang mga hukuman na naglilitis ng mga kaso laban sa ilegal na droga.

Mismong si Duterte ang nagsabi na hindi makikipag-tulungan ang gobyerno dahil hindi na miyembro ng ICC ang Pilipinas.

Sinabi rin ni Roque na ang dapat imbestigahan ng ICC ay ang patayan ng New People’s Army dahil sasayangin lamang nila ang panahon at resources.