MANILA, Philippines — Tiniyak ni PNP Chief, Gen. Guillermo Eleazar na bantay-sarado pa rin nila ang mga tourist destination at leisure spots bagama’t isinailalim na sa general community quarantine ang NCR Plus.
Ayon kay Eleazar, pinaalalahanan niya ang kanyang mga tauhan na imonitor ang operasyon ng mga tourist site at leisure spots sa Metro Manila at lalawigan kabilang ang Cavite, Laguna, Rizal at Bulacan. Tutukan ng mga pulis ang mga paglabag sa minimum public health safety protocols at koordinasyon sa mga local government units.
Isinailalim ang NCR Plus sa GCQ with heightened restrictions hanggang Mayo 31.
Sinabi ni Eleazar na marami ang nagtungo sa ilang mga tourist attraction na 30% capacity lamang ang pinapayagan.
Aniya, naiintindihan nila ang pananabik ng mga Filipino na makapamasyal subalit kailangan pa rin ang pag-iingat dahil nananatili ang banta ng COVID-19.
Napaghandaan at mahigpit din nilang babantayan ang business establishments at leisure areas dahil inaasahan na rin nila ang pagdami ng mga taong magsisilabasan dahil sa adjustments sa allowed capacity rates.