Pinakamalamig na temperatura sa Metro Manila, naitala ng PAGASA

Simula noong Nobyembre

MANILA, Philippines — Naitala ng state weather bureau na PagAsa nitong madaling araw ng Linggo, ang pinakama­lamig na temperatura sa Me­tro Manila simula noong Nobyembre.

Batay sa tala ng Pag­Asa, dakong alas-5:00 ng madaling araw nang umabot sa 19.3 degrees Celsius ang temperatura sa Metro Manila.

Ipinaliwanag ni Pag­Asa weather forecaster Raymond Ordinario na epekto ito ng hanging amihan.

“Ito ‘yong hangin na ga­ling dito sa mainland Asia o sa mainland China na during this time na spring na kasi. Ibig sabihin, natutunaw na ‘yong ibang yelo so malamig ‘yong ha­ngin na galing sa Tsina na dumidiretso dito sa atin,” paliwanag ni Ordinario.

Samantala, nakapagtala rin naman nang ma­lamig na temperatura sa iba pang panig ng bansa, kabilang ang Baguio City (9 degrees Celsius); Tanay, Rizal (16.5 degrees Celsius); Tugue­garao City (17.7 degrees Celsius); Laoag, Ilocos Norte (16.8 degrees Celsius); Basco, Batanes (17 degrees Celsius); at Benguet (7.9 degrees Celsius).

Nabatid na kalimitang nagtatagal ang panahon ng amihan hanggang ka­tapusan ng Pebrero.

Gayunman, dahil bumubugso pa rin ito ay maaari umanong umabot pa ang malamig na panahon hanggang ikalawang linggo ng Marso.