MANILA, Philippines — Nagbayad ng P500 milyon ang Philippine Health Insurance Corp. (PhilHealth) o kalahati ng P1.1 bilyong utang nito sa Philippine Red Cross (PRC) para sa COVID-19 swab tests na isinagawa nito.
Mismong si PhiHealth president at CEO Dante Gierran ang nagkumpirma na ini-release na ng PhilHealth ang P500 milyong partial payment nila sa PRC at tiniyak na bibilisan din ang pagproseso para mabayaran ang kanilang matitirang balanse, habang istriktong sumusunod sa accounting rules at regulations ng pamahalaan.
Una nang itinigil ng PRC ang swab tests na naka-charge sa PhilHealth.
Sinabi ng PRC na magsasagawa lamang muli sila ng swab tests sa sandaling makapagbayad na ang Philhealth sa kanila.
Nangako naman ang PhilHealth na magbabayad nitong Lunes, Oktubre 26, ngunit hindi ito natupad.