Boracay bubuksan na sa Oktubre

MANILA, Philippines — Para mapanumbalik na ang dating sigla at ekonomiya, bubuksan na sa mga turista sa lahat ng parte ng bansa ang sikat na isla ng Boracay pagsapit ng Oktubre 1.

Ngunit bago magsaya, ipinaalala ni Tourism Secretary Bernadette Romulo-Puyat na kailangan munang makapagpakita ng isang turista na negatibo siya sa COVID-19 confirmatory tests na isinagawa may 48-72 oras bago ang kanilang biyahe sa isla.

Maaari rin umano silang tumanggap ng mga domestic tourists mula sa mga lugar na nasa ilalim pa ng general community quarantine (GCQ) dahil dadaan rin naman ang mga ito sa swab tests bago tuluyang makapasok sa isla.

Tiniyak naman ni Interior and Local Government Secretary Eduardo Año na may nakahanda na silang quarantine facility sa isla para sa mga turistang magpo-positibo sa virus.

Nakahanda na rin ang nasa 199 hotels at resorts na tumanggap na ng mga turista.

Isinara ang isla noong Marso dahil sa pandemya. Una itong binuksan nitong Hunyo ngunit para lamang sa mga residente ng Aklan, Antique, Capiz, Guimaras, Negros Occidental, Bacolod at Iloilo.