Oras ng negosyo ’wag sabay-sabay
Para iwas siksikan sa PUVs
MANILA, Philippines — Ipinanukala ng isang opisyal ng Philippine College of Physician (PCP) sa pamahalaan na magpatupad ng ‘staggered’ o hindi sabay-sabay na pagbubukas ng mga negosyo upang hindi magsiksikan ang mga empleyado sa mga pampublikong sasakyan sa parehong mga oras.
Sinabi ni Dr. Maricar Limpin, vice-president ng PCP na maaaring pakiusapan ng pamahalaan ang mga negosyo na huwag magsabay-sabay ng pagbubukas o oras ng trabaho para maiwasan ang tinatawag na “rush hours”.
Sa pamamagitan nito, makakaya rin umanong maipatupad ang isang metrong physical distancing sa mga pampublikong sasakyan dahil sa mas kakaunti ang pasahero sa bawat oras. Maaari umano na hindi na rin ipatupad ang pagbabawas sa physical distancing sa .75 metro.
Kasunod nito, nanawagan rin si Limpin sa publiko na huwag masyadong umasa sa bakuna na nililikha ng ibang bansa kontra sa COVID dahil sa kasalukuyang may nakikita pang ‘side effects’ ang mga eksperto. Importante umano na magtagpo ang pagiging epektibo ng bakuna sa pagiging ligtas nito.
- Latest