MANILA, Philippines — Umaabot sa P14.1 bilyon ang nagasta ng pamahalaan sa pagbili ng mga Personal Protection Equipments (PPEs), test kits at iba pang medical equipments kaugnay ng paglaban ng pamahalaan sa COVID-19.
Ito ang nilalaman ng lingguhang ulat ni Pangulong Rodrigo Duterte sa Kamara.
Kabilang sa nagasta ng gobyerno ay nasa P12.1 bilyon sa pagbili ng 6,062,019 PPE sets; P1.6 bilyong magkakaibang uri ng PCR (Polymerase Chain Reaction) test kits.
Samantala, nasa 10 units naman ng automated nucleic acid extraction machines ang nabili ng gobyerno sa halagang P400-M.
Iniulat din ni Pangulong Rodrigo na nasa 1,458,000 PPE sets ang nai-deliver na habang nasa 65,330 PPE sets ang nabili gamit ang savings mula sa pondo sa naunang procurement.
Sinimulan na rin ng Department of Science and Technology ang mass production ng mga reusable face masks sa rate na 10,000 masks kada linggo at hangad itong mapataas sa 50,000/linggo bago magtapos ang Hunyo.