MANILA, Philippines — Kinumpirma ni Presidential Spokesperson Harry Roque na bumiyahe pauwi ng Davao City si Pangulong Rodrigo Duterte upang makapiling ang kanyang pamilya.
Sinabi ni Roque na kamakalawa (Biyernes) umalis ang Pangulo sa Maynila.
Unang bumalik sa Davao ang Pangulo noong Mayo 16 matapos ang mahigit na dalawang buwan na pananatili sa Malacañang dahil sa enhanced community quarantine.
Ayon pa kay Roque, magkakaroon ng talumpati ang Pangulo sa Davao at umaasa siya na magkaroon din doon ng isang press briefing.
Hindi binanggit ni Roque kung kailan babalik sa Maynila ang Pangulo.
Kalimitang nagsasalita sa bayan ang Pangulo tuwing Lunes ng gabi tungkol sa ginagawa ng gobyerno para labanan ang COVID-19.