MANILA, Philippines — Bukas ang Presidential Communications Operations Office (PCOO) sa mungkahing mapanood din sa mga bumibiyaheng bus na mayroong TV screens ang 50 minutong documentary na nagpapakita sa masamang epekto at kasalukuyang drug situation sa bansa.
Ayon kay PCOO Sec. Martin Andanar, lahat ng mga lugar na may makikitang screen ay ikokonsidera nilang mabigyan ng kopya ng kanilang inihandang documentary na pinamagatang “gramo.”
Aniya, malaki ang maitutulong nito upang mas mapalawak pa ang kanilang information dissemination sa gitna ng patuloy na pagpupursige ng Administrasyon na maihatid ang karumaldumal na epekto ng droga sa lipunan.
Layon talaga ng 50 minutong dokumentaryo na maipakita ang drug scenario sa international at diplomatic community ganundin sa United Nations sa Geneva at New York na idadaan sa permanent mission ng Pilipinas.
Makikita din sa documentary ang Chinese drug lord na si Lim Seng na nasintensiyahan ng parusang kamatayan at na- firing squad nuong January 15, 1973 sa Fort Bonifacio dahil sa drug offense.