MANILA,Philippines — Sinibak ni Pangulong Rodrigo Duterte si Vice President Leni Robredo bilang co-chair ng Inter-Agency Committee on Anti-Illegal Drugs (ICAD).
“The Palace is announcing the termination of the services of Vice President Ma. Leonor Robredo as Co-Chairperson of the Inter-Agency Committee on Anti-Illegal Drugs (ICAD),” ayon kay Presidential Spokesman Salvador Panelo.
Kinumpirma rin ito kagabi ni Executive Secretary Salvador Medialdea.
Sinabi pa ni Panelo na ang pagtatalaga kay Robredo ng isang tungkulin ay isang alok at tsansa na magkaisa ang administrasyon at ang oposisyon sa kampanya laban sa droga.
Pero, sa kasawiang palad, sabi ni Panelo, sinayang niya (Robredo) ang oportunidad na iyan at gamit ang platapormang iyan ay inaatake ang mga pamamaraang ginagawa ng administrasyon.
Idinagdag ni Panelo na nasira lalo ang naturang oportunidad nang hilingin niya ang police data na nagpapabalido sa kasinungalingan ng kanilang (oposisyon) argumento na state sponsored ang extra-judicial killings.
Magugunita na sinabi mismo ng Pangulo na wala itong tiwala kay Robredo kaya hindi niya ito ginawang cabinet member.
“Kung seryoso si VP Robredo sa paglutas ng problema sa droga, dapat sanang bumaba siya sa grassroot, nakipag-usap sa mga biktima, sa kanilang pamilya at sa mga komunidad. Sa halip, mas pinili niyang humarap sa mga opisyal ng United Nations at United State Embassy na nananatiling out-of-touch sa mga realidad ng problema sa droga sa ground,” sabi pa ng tagapagsalita ng Pangulo.
Pinuna ng Pangulo ang agad na pakikipag-usap ni Leni sa mga foreign individuals at organization na kritiko pa mismo ng drug war.
Pinuna ni Panelo na sinisiraan ni Robredo sa mundo ang bansa at minamaliit ang pagsisikap ng pamahalaan na ipreserba ang general welfare.
Itinalaga ni Pangulong Duterte si Robredo bilang co-chair ng ICAD noong November 5.