MANILA, Philippines — Namatay kahapon makaraang mawalan ng malay sa isang basketball game ang anak at kapangalan ng bilyunaryong si Lucio Tan. May edad na siyang 53 anyos.
Kilala sa palayaw na Bong, naluklok si Lucio Tan Jr. bilang pangulo ng holding firm ng Philippine Airlines dalawang linggo bago siya pumanaw. May mataas siyang posisyon sa family-controlled LT Group, Tanduay, at Philippine National Bank.
Nagpaabot ng pakikiramay ang Malacañang sa pagpanaw ni Tan Jr.
Sa press briefing sa Palasyo, sinabi ni Presidential Spokesman Sec. Salvador Panelo na personal niyang kilala si Bong Tan.
Inilarawan ni Panelo ang PAL Holdings president bilang mabait at mapagkumbaba. Isa din umano itong mabuting kapatid at anak.
Nitong umaga nang bawian ng buhay si Lucio Tan Jr. dahil sa brain aneurysm habang nakaratay sa Cardinal Santos Medical Center, San Juan City.