MANILA, Philippines — Lumakas pa ang bagyong Quiel na ngayon ay nasa kategorya na ng severe tropical storm.
Ayon sa PAGASA, namataan si Quiel sa layong 360 km kanluran hilagang kanluran ng Coron, Palawan taglay ang lakas ng hangin na 95 kph at pagbugso na 115 kph.
Kumikilos ito nang pa-silangan sa napakabagal na pag-usad.
Ngayong Biyernes makakaranas ng katamtaman na minsa’y malakas na pag-ulan sa buong Cagayan kasama na ang Babuyan Islands at Apayao.
Mahina hanggang sa katamtaman naman hanggang sa malakas na pag-ulan ang mararanasan sa Kalinga, Apayao, Ilocos Norte, Zambales, Bataan, Palawan, Mindoro Provinces, Antique, Iloilo at Guimaras.
Kahit na may paglakas si Quiel ay hindi naman ito babagsak sa lupa.
Samantala, patuloy namang uulanin ang Northern Luzon dahil sa umiiral na cold front at hanging amihan.
Hindi naman papasok sa bansa ang malakas na bagyong may international name na Halong na nasa labas ng Philippine Area of Responsibility.