Duterte sumemplang sa motorsiklo
MANILA, Philippines – Tiniyak ni Sen. Bong Go na maayos ang lagay ni Pangulong Rodrigo Duterte matapos sumemplang ang sinasakyan nitong motorsiklo sa loob ng Malacañang compound noong Miyekules ng gabi.
Sa ngayon ay nasa Bahay Pagbabago ang Pangulo at kasalukuyang nagpapahinga.
Bukod sa idinadaing ang masakit na balakang ay wala namang nabanggit pa si Go na may iniindang sakit ang Pangulo. Magpapa-check up pa aniya ito para malaman kung may iba pang injuries.
Sinabi ni Go na medyo mataas ang ikalawang motor na sinakyan ng Presidente at medyo sumemplang ito papuntang parking at naitukod ang siko.
Nilinaw naman ni Presidential Security Group chief General Jose Eriel Niembra na hindi naman sumemplang si Pangulong Duterte sa motorsiklo.
Klaripikasyon ni Niembra, sumabit lang ang isang gulong ng motorsiklo sa isang obstruction pero hindi naman natumba.
Paglilinaw pa ng PSG chief, trike o 3-wheeled ang minaneho ng Presidente kaya’t hindi aniya ito maaaring sumemplang.
Mahina lang din daw ang takbo ng Chief Executive habang palabas ng garahe ng PSG compound.
- Latest
