13 ‘ninja cops’ nasa peligro - Magalong
MANILA,Philippines — Namemeligro ang kaligtasan ng mga ‘ninja cops’ (mga pulis na nagre-recycle ng nakukumpiskang droga) na sangkot sa kontrobersiyal na drug raid sa Pampanga noong 2013.
Ito ang ipinahiwatig kahapon ni Baguio City Mayor Benjamin Magalong na dating hepe ng PNP-Criminal Investigation and Detection Group.
“Sana maisip ng mga sangkot sa 2013 drug bust sa Mexico, Pampanga na wala na silang matatakbuhan at magsimula na silang magsalita. Maliban na lang kung mapatay sila na tulad ng nangyari sa ibang civilian agents na sangkot din sa drug operation,” sabi ni Magalong sa panayam sa Early Edition ng ANC. “Kaya dapat nang unahin ang kaligtasan ng mga pulis na ito.”
“Dapat nilang tiyakin na walang mangyayaring masama sa mga ito (ninja cops). Isa lang kasi ang nakakulong, si (Rodney) Baloyo lang. Ang iba ay gumagampan pa ng kanilang trabaho bilang pulis o nasa floating status. Kung titignan ang sangkot na mga civilian agent, lahat sila patay na, pinatay sila. Maaaring mangyari ang anumang bagay,” babala ni Magalong.
Kabilang si Baloyo sa 13 ‘ninja cops’ na kumuha umano ng 160 kilong shabu mula sa P648 milyong halaga ng droga sa Mexico.
Ang naturang mga droga ay nakumpiska sa isang anti-narcotics operation laban sa umano’y Chinese drug lord na si Johnson Lee noong 2013.
Lumitaw sa imbestigasyon na pinakawalan ng mga pulis si Lee kapalit ng P50 milyon.
- Latest
