Alan Cayetano suportado para speaker
MANILA, Philippines — Dahil sa pinakamalawak na karanasan at maipagmamalaking track record sa pagsisilbi sa pamahalaan kaya si dating Foreign Affairs Secretary Alan Peter Cayetano ang napipisil na suportahan bilang Speaker ng Kamara de Representantes sa 18th Congress ng National Unity Party (NUP).
Paliwanag ni dating Interior and Local Government Secretary Ronaldo Puno, chairman ng NUP, si Cayetano ang kandidatong respetado ng lahat ng miyembro ng Kongreso at napatunayan na ring tapat kay Pangulong Duterte at sa mga programa niya para sa pagbabago.
Ayon kay Puno, ang NUP ay may coalition agreement sa Hugpong ng Pagbabago na pinangungunahan ni Davao City Mayor Sara Duterte-Carpio kaya ito ay nakapangako nang susuporthan ang kandidato para sa Speaker ng HNP kung ito ay may ieedorso sa darating na Kongreso.
Kung magpasya ang HNP na walang suportahan na kandidato sa pagka-Speaker, wala pa ring papatakbuhin ang NUP sa labanan para sa pinakamataas na pwesto sa Kamara.
Sinabi pa ni Puno, na sinuportahan din ng NUP noon ang napili ng HNP na kandidato sa pagka-Speaker na si dating Pangulong Gloria Macapagal-Arroyo.
Sa kabila nito, maaga pa rin umano para pag usapan ang nasabing isyu dahil magkakaroon pa ng eleksyon sa darating na Mayo.
- Latest