MANILA, Philippines — Hindi bibitiwan ng Malacañang si Budget and Management Sec. Benjamin Diokno sa harap ng panawagan ng Kongreso kay Pangulong Duterte na patalsikin na sa kanyang puwesto ang DBM Chief.
Ito’y sa gitna ng kontrobersiyang ipinupukol ngayon kay Diokno dahil sa umano’y P75 billion insertions sa proposed budget ng DPWH para sa 2019.
Ayon kay Presidential Spokesman Salvador Panelo, kanilang nirerespeto ang panawagan ng ilang kongresista na idinaan pa sa House Resolution 2365 ang nais na pagpapatalsik sa kalihim.
Wika ni Panelo, hindi nila mapagbibigyan ang nasabing panawagan gayung nananatili ang tiwala mismo ng Pangulo kay Diokno.
Sa katunayan, itinuturing “one of the best and the brightest” sa hanay ng mga opisyal ni Pangulong Duterte si Diokno habang hindi aniya matatawaran ang reputasyon nito bilang isang competent public servant.
Panawagan ng Palasyo sa Kongreso, itama na lamang ang mga maling nadiskubre nito sa proposed budget at kung gustong kasuhan ay kasuhan na lamang kung sa tingin ay may nagawang iregularidad ang DBM chief.