Backchannel talks sa NDF sinuspinde

MANILA, Philippines — Sinuspinde na ng gobyerno ang lahat ng backchanneling talks sa National Democratic Front (NDF).

Sinabi ni Presidential Spokesman Harry Roque, suspindido sa loob ng 3 buwan ang lahat ng backchanneling talks sa communist group habang nirerebyu ang lahat ng nilagdaang kasunduan ng gobyerno at NDF.

Ayon kay Roque, gagamitin din ang tatlong buwan para magsagawa ng public consultation para makuha ang buong suporta ng publiko sa peace talks sa NDF.

Pormal na ipinabatid ng government panel negotiator Hernani Braganza kay NDF chief negotiator Fidel Agcaoili at CPP founder Jose Maria Sison ang nasabing suspension.

Nagpasalamat naman ang Malacañang sa lahat ng tumulong sa pagsusulong ng peace talks sa pagitan ng gobyerno at CPP-NPA-NDF gayundin sa Royal Norwegian government.

Magugunita na inihayag din ni Pangulong Duterte na mas nais nitong dito gawin sa bansa ang peace talks kaysa sa ibang bansa.

Inimbitahan mismo ni Duterte si Joma Sison na umuwi ng bansa at handa niyang sagutin ang lahat ng gastusin nito kasabay ang paniniguro sa seguridad nito habang nasa Pilipinas para sa peace negotiations.