Modernong PUJs papasada na ngayon
MANILA, Philippines — Simula ngayong Lunes ay papasada na ang mga bago at modernong public utility jeepneys (PUJs), bilang bahagi ng PUV Modernization Program (PUVMP) na isinusulong ng pamahalaang Duterte, na layong makapagbigay ng de kalidad, ligtas, environment-friendly at abot-kayang public transport sa mga mamamayan.
Ayon sa Department of Transportation (DOTr), binigyan na nila ng ‘go signal,’ sa pamamagitan ng Land Transportation Franchising and Regulatory Board (LTFRB), ang Senate Employees Transport Service Cooperative (SETSCO) na ilunsad ang kanilang mga bago at modernong PUJs.
Ang SETSCO ay binubuo ng 22-operator, na pinamumunuan ng chairperson nito na si Remedios Venturina, at kabilang sa tatlong pre-selected cooperatives na lumahok sa inisyal na implementasyon ng PUVMP.
Sinabi ng DOTr na 15 sa kabuuang 35 modern PUJ units ang magsisimula nang bumiyahe ngayong hapon, at ang mga ito ay may rutang ‘Star City/CCP hanggang PICC, GSIS/Senate hanggang MOA hanggang PITX at pabalik.’
- Latest