Robredo iginiit na malinis ang pagkapanalo noong 2016 elections
MANILA, Philippines — Binigyang diin ni Vice Pres. Leni Robredo na malinis ang kanyang pagkapanalo noong 2016 elections at hindi niya habol ang trabaho ni President Duterte.
Sa ikalawang bahagi ng panayam kay Robredo na ipinoste sa kanyang Facebook account, sinabi nitong nanalo na siya at sadyang hindi maka-move on ang ilang tao.
Pinagsumikapan umano ng kanyang pamilya ang lahat ng bagay na meron sila at ipinunto nito na walang anumang kasaysayan ng pagnanakaw sa kaban ng yaman ng bansa at pandaraya ang kanyang pamilya.
“Nanalo na ako at meron pa talagang hindi maka-move on. Obvious naman kung saan nagmumula ang fake news sa bagay na ‘to. Sa tuwing sasabihin nilang fake VP ako, uulitin ko at makikita ninyo sa record na walang anumang history ng pandaraya ang pamilya namin,” wika ni Robredo.
Hindi rin umano totoo ang mga report na ibinoto siya ng isang patay na sa isang lalawigan.
“I don’t really have experience in cheating in elections, to steal from the nation’s coffers, and I haven’t committed any irregularity. We will see who has the capacity and the history to cheat,” aniya.
Nahaharap si Robredo sa electoral protest na isinampa ni dating Sen. Bongbong Marcos Jr. na ayon dito ay minanipula umano ang vote-counting machines na ginamit sa 2016 polls para paboran ang bise presidente.
- Latest
